Na ndihmoni t'ju ndihmojmë të merrni kujdesin më të shpejtë

Alternativa juaj ndaj shërbimit të urgjencave: Kujdesi vetjak

• Kujdesi vetjak është mënyra më e mirë për trajtimin e sëmundjeve dhe lëndimeve të zakonshme, siç janë kolla dhe ftohjet, prerjet dhe gërvishtjet e lehta të lëkurës, ndrydhjet dhe sforcimet, dhimbjet e fytit, sinusiti, dhimbja e veshit, konstipacioni dhe dhimbjet e kokës.
• Këto mund të trajtohen në shtëpi me një sërë barnash dhe një kuti të ndihmës së shpejtë të blerë në farmaci ose supermarket.
  Mund të përgatiteni për shumë sëmundje dhe lëndime të zakonshme duke bërë një bisedë me farmacistin e zonës, i cili mund t'ju këshillojë për barnat e kujdesit vetjak që duhet t'i keni në shtëpi.
• Për të gjitha rastet e kujdesit vetjak, nëse simptomat përsëriten, ose nëse nuk përmirësoheni pas dy ditësh, telefononi NHS 111 për këshillim ose kontaktoni mjekun tuaj të përgjithshëm.

Alternativa juaj ndaj shërbimit të urgjencave: NHS 111

• Nëse ju duhet ndihmë mjekësore por nuk jeni të sigurt ku të drejtoheni, atëherë flisni përpara se të lëvizni. Ju mund të telefononi NHS 111 pa pagesë, 24 orë në ditë, 365 ditë në vit dhe, sipas rastit, një këshillues klinik do të vlerësojë simptomat tuaja, do të vendosë për ndihmën mjekësore që ju nevojitet dhe do t'ju këshillojë se ku të drejtoheni. Kjo garanton që ju të merrni kujdesin e duhur nga shërbimi i duhur në kohën e duhur.
• Këshilluesit klinikë të NHS 111 mund të organizojnë për ju një takim jashtë orarit në zyrën e një mjeku të përgjithshëm ose në një qendër me orare të zgjatura nëse gjendja juaj kërkon që ju të vizitoheni nga një profesionist i kujdesit shëndetësor brenda 12 orëve të ardhshme. Gjithashtu, ata mund t'ju ofrojnë këshillim dhe informacion rreth kujdesit vetjak.

Ju duhet të telefononi NHS 111 nëse:

• Keni nevojë për ndihmë mjekësore të shpejtë, por që nuk është urgjencë për të telefonuar 999
• Mendoni se duhet të paraqiteni pranë shërbimit të urgjencave ose një shërbimi tjetër të kujdesit urgjent të NHS
• Nuk dini se kë të telefononi për ndihmë mjekësore ose nuk keni një mjek të përgjithshëm të cilin ta telefononi
• Keni nevojë për informacion shëndetësor ose që t'ju sigurojnë lidhur me atë që duhet të bëni më pas

Për nevoja shëndetësore më pak urgjente, duhet të kontaktoni gjithsesi me mjekun e përgjithshëm me mënyrën e zakonshme.

Alternativa juaj ndaj shërbimit të urgjencave: Farmacisti i zonës

Farmacisti i zonës është një profesionist i kujdesit shëndetësor që mund t'ju japë këshillim klinik dhe trajtim për sëmundjet e zakonshme si p.sh. kolla, ftohjet dhe dhimbjet. Gjithashtu, ai mund t'ju ndihmojë të vendosni nëse duhet të kontaktoni shërbime të tjera të kujdesit shëndetësor.

Mund të flisni me farmacistin tuaj në mirëbesim, edhe për simptomat më personale pa pasur një takim. Tanimë shumë farmaci kanë një zonë konsultimi ku mund të diskutoni privatisht për shqetësime shëndetësore. Disa nga shërbimet e disponueshme të farmacisë lokale përfshijnë ndihmën për:

• Temperaturën e lartë/ethet
• Kollën, ftohjet, gripin
• Infeksionet dhe dhimbjet e veshit
• Infeksionet urinare dhe cistitin
• Diarrenë/të vjellat
• Infeksionet e lëkurës/shpërthimet në lëkurë/reaksionet alergjike
• Konjunktivitin

Për detajet e farmacisë lokale më të afërt, si dhe për orarin e punës, vizitoni faqen nhs.uk.

.

Alternativa juaj ndaj shërbimit të urgjencave: Mjekë të përgjithshëm dhe qendra shërbimi jashtë orarit

Shërbimi jashtë orarit i mjekëve të përgjithshëm

• Shërbimi jashtë orarit i mjekëve të përgjithshëm është një strukturë e veçantë ku një ekip mjekësh të përgjithshëm dhe infermierësh të specializuar ofrojnë shërbime nga ora 18:30 deri në 8:00 gjatë ditëve të javës, festave zyrtare dhe fundjavave. Ata ofrojnë ndihmë, këshillim dhe trajtim nëse keni një nevojë klinike urgjente që nuk mund të presë sa të hapet zyra e mjekut tuaj të përgjithshëm.
• Nëse duhet të vizitoheni ose të flisni me një mjek të përgjithshëm kur klinika e tij është e mbyllur, telefononi NHS 111 dhe, sipas rastit, një këshillues klinik do t'ju vlerësojë, japë këshillim se kur dhe ku të paraqiteni për trajtim, ose do t'ju rezervojë një takim me një mjek të përgjithshëm jashtë orarit nëse është e nevojshme.

Qendrat me orare të zgjatura

• Nëse jeni regjistruar pranë zyrës së një mjeku të përgjithshëm, ju mund të keni akses në takime me infermierë mbrëmjeve, fundjavave dhe gjatë festave zyrtare në xxxx.
• Qendrat me orare të zgjatura përbëhen nga mjekë të përgjithshëm dhe infermierë me përvojë të zonës dhe ofrojnë vlerësim dhe trajtim për të rritur dhe fëmijë.
• Takimet ofrohen pasi zyra e mjekut të përgjithshëm të jetë mbyllur, për të garantuar që pacientët të kenë akses në një mjek të përgjithshëm gjatë mbrëmjeve të javës deri në orën 21:00 dhe fundjavave kur pjesa më e madhe e klinikave lokale janë të mbyllura

Për të pasur akses në shërbim

• Telefononi zyrën e mjekut të përgjithshëm dhe kërkoni një takim në qendrën me akses të zgjatur
• Telefononi NHS 111 dhe ata mund t'ju rezervojnë një takim në një nga qendrat